|
حلیم یارقین ینگی کتابلر بیلن تانیشینگ! پروفیسور غلام محمد میمنهگی شخصیتی نی اولوغلش طنطنهلی سمیناری احتفالی اوچون سمینارگه پیشکش قیلینگن کتابلرپروفیسور غلام محمد میمنهگی شخصیتینی اولوغلش سمیناری مناسبتی بیلن قطار ایشلر و تدبیرلرده ینگی کتابلر کۉرگزمه سی هم یۉلگه قۉییلگن اېدی. شو مناسبت بیلن (5) عنوان کتاب اشتراکچیلرگه پیشکش قیلیندی. بولردن، تانیقلی عالم دکتور عنایت الله شهرانی تألیف اېتگن «شرح احوال و آثار پروفیسور غلام محمد میمنهگی» شو سمینارگه اته لیب، سمینار کمیسیونی تمانیدن چاپ اېتیلگن اېدی. بو کتاب سمینار اشتراکچیلریگه ساوغه قیلیندی. بوندن تشقری، سمینارده اۉزبیک کلاسیک ادبیاتیگه تیگیشلی تۉرت عنوان کتاب هم کۉرگزمه و ساتووگه قۉییلدی. قوییده سیز عزیز اۉقووچیلرگه شو کتابلرنی قیسقه چه تانیته میز: شرح احوال و آثار پروفیسور غلام محمد میمنهگی پروفیسور غلام محمد میمنهگی سیویملی اولکه میز افغانستان هنر آسمانی نینگ اېنگ پارلاق یولدوزی همده ییریک سیاسی و اجتماعی شخصیتلریدن بیری دیر. پروفیسور اۉزی نینگ قیمتلی هنری اثرلری، اېزگو اجتماعی فعالیتلری، اینیقسه اولکه میز بیرینچی مشروطیت جنبشی نینگ بویوک و فعال رهبرلریدن بیری صفتیده اولکه میز تاریخیده یوکسک اۉرین توته دی. پروفیسور شخصیتی و فعالیتلری حقیده کۉپلب مقاله، رساله وکتابلر یازیلگن. بیراق جناب دکتور عنایة الله شهرانی تألیف قیلگن «شرح احوال وآثارغلام محمد میمنهگی» آتلی کتاب ،اۉزی نینگ نادر تاریخی سندلر، عکسلر ومعلوماتلریگه کۉره برچه اثرلردن اوستون تورهدی. کتاب 357 بیت، چیرایلی قطع، صحافت، کاغذ و 1000 نسخه ده، تانیقلی عالم جناب برهان الدین نامق ویراستارلیگی و اهتمامی بیلن کابلده چاپ اېتیلگن. بو چاپ اثرنینگ ایکینچی نشری بۉلیب، کتاب نینگ بیرینچی نشری 1384 ییلی پشاورده عملگه آشیریلگن اېدی. کتاب عموماً دری تیلیده یازیلگن و قوییدهگی بۉلیملردن عبارت: فصل اول: پیشگفتار، هنر نقاشی در افغانستان، سخن اندر باب میمنه، الحاق میمنه تورکستان به خاک افغانستان فصل دوم: شرح احوال و سوانح پروفیسور غلام محمد میمنهگی، غلام محمد میمنهگی (نقاش افسانوی)، نقاش کیمیاگر، غلام محمد میمنهگی نقاش و نویسنده، فصل سوم: مقام فرهنگی غلام محمد میمنهگی فصل چهارم: چهره ها و آثار نقاشی پروفیسور غلام محمد میمنهگی فصل پنجم: خاطره ها در نامه ها، خاطره ها در تصویرها فصل ششم: سرخابیان قسمت اول (سرخابیان، سرخاب و سرخابی، شجره سرخابیان، فرزندان پروفیسور، در باره تخلص سرخابی) قسمت دوم: غلام محمد میمنهگی آغازگر آموزش رسمی هنر در افغانستان فهرست مآخذ فصل هفتم: تالیفات پروفیسور غلام محمد میمنهگی فصل هشتم: کتاب اول پروگرام مکتب ابتدایی رسم فصل نهم: کتاب دوم ترسیم تشریحی نظام استخوان بندی حیوانات فصل دهم: زندهگینامه مؤلف، ابراز سپاس، اظهار قدردانی. بابرنامه (افغانستان بولیمی) ینگی دری ترجمه سینینگ ینگی نشری ظهیرالدین محمد بابرشاه نینگ «بابرنامه» اثری جهان ادبیاتیده قیمتلی قاموسی اثر صفتیده کته علمی اعتبار و اهمیتگه اېگه دیر. عیناً شو باعث، «بابرنامه» جهان عالملری همده علمی مرکزلری نینگ دقت مرکزیده بۉلیب کیلماقده. حاضرگی کونده «بابرنامه» جهان نینگ (30) گه یقین مهم تیللریگه اۉگیریلگن. ترجمه لرنینگ اېنگ سۉنگگی سی دری تیلیگه عملگه آَشیریلگن. «بابرنامه» نینگ تۉرتته دری ترجمه سی بار، البته. اولردن اېنگ مشهوری، جلال الدین اکبر زمانیده عبدالرحیم خان خانان فارسچه گه اۉگیرگن ترجمه دیر. بولردن عبدالرحیم خان خانان نینگ ترجمه سی گینه قریب 130 ییل بورون، انیقراغی هجری قمری (1308) ییلی بیرینچی بار بمبی شهری (هندوستان) ده تاش باسمه ده باسیلگن. بو ترجمه نینگ تیلی 500 ییل بورونغی دری تیلی بۉلیب، نسخهلری اېسه جدا نایاب و فقط کتابخانه لردن تاپیش ممکن. شونینگ اوچون بو مهم اثرنینگ حاضرگی دری تیلیگه ترجمه قیلینیشی گه جدی ضرورت و ایستک بار اېدی. بونداق قاموسی اثرنینگ ترجمه ایشی البته آغیر اېدی. افغانستان علوم اکادمیسی بو ایشنی ریجه لشتیرر اېکن، اونی تانیقلی بابرشناس عالم دکتور شفیقه یارقین نینگ ذمه سیگه قۉیدی. تانیقلی عالملر پوهاند عبدالحی حبیبی، اکادمیسین عبدالشکور رشاد و کاندید اکادمیسین دکتور واحدی لرنینگ مصلحتی و کینگاشلریگه کۉره، بیرینچیدن «بابرنامه» نینگ افغانستان بۉلیمی ترجمه سی قۉل آستیگه آلیندی. بو ترجمه عادی بیر ترجمه گینه بۉلمهی، بلکه عبدالرحیم خان خانان نینگ دری ترجمهسی همده تورکچه، انگلیسچه و روسچه ترجمه لری قاله بیرسه، تاشکینت و تورکیه ده باسیلیب چیققن سکیزته معتبر نسخهلر سالیشتیریلگن حالده، جناب کاندید اکادمیسین دکتور واحدی نظری آستیده حاضرگی دری ادبی تیلیگه اۉگیریلگن. بنابرین، بو ترجمه تنقیدی-قیاسی بیر ترجمه دیر. عیناً شو نقطه نظردن، ترجمه کته محنت و آغیر ایش طفیلی اۉرته گه کیلیب، ایلگرگی نشرلر و ترجمه لردهگی یۉل قۉییلگن کۉپلب ینگلیشلر تۉغریلنگن. شو باعث، بو ترجمه نسبتاٌ ایشانچلی و اعتبارلی نسخه بۉلگن. بو ترجمه بیرینچی قتله افغانستان علوم اکادمیسی تمانیدن (1386) ییلی کابلده چاپ اېتیلگن اېدی. اوندن تشقری، افغانستان علوم اکادمیسی «بابرنامه» نینگ افغانستان بۉلیمینی، دکتور شفیقه یارقین تیارلهگن اۉزبیکچه متنی نی هم ایری کتاب شکلده نشر اېتگن اېدی. ایکله کتاب اۉقووچیلر و مخلصلرنینگ استقباللری طفیلی آز مدتده توگب قالدی. شو باعث، افغانستان تشقی ایشلر وزیرلیگی «بابرنامه» نینگ دری ترجمه سینی ایکینچی قتله نشر قیلینیشینی ریجهلشتیردی. بو نشر تشقی ایشلر وزیرلیگی، دیپلماسی انستیتوتی مدیری جناب غلام سخی غیرت اهتمامی بیلن چیرایلی اۉلچم، صحافت، کاغذ و 3000 تیراژده، 1388 ییلی کابلده، اعتصام باسمه خانه سیده چاپ اېتیلدی. بو کتاب هم پروفیسور غلام محمد میمنهگی سمیناریده علاقه مندلرگه عرضه قیلینگن اېدی. اېسلش کېرهک که، «بابرنامه» نینگ اۉزبېکچه تۉلیق متنی اۉتگن ییلی (1387) مزارشریفده، میرزا اولوغ بېک فرهنگی انجمنی تمانیدن، پوهنیار هدایت الله هدایت اهتمامی، کاندید اکادمیسین دکتور محمدیعقوب واحدی نینگ مقدمهسی و دکتور شفیقه یارقین نینگ کیریش سۉزی بیلن 1000 تیراژ، چیرایلی اۉلچم، صحافت و کاغذده نشر اېتیلگن اېدی. دکتور واحدی مقدمه سیده «بابرنامه» نینگ تورلی اولکه لر کتابخانه لریدهگی 22 ته قۉلیازمه لری، انگلیسچه، روسچه، تورکچه، آلمانچه کبی تورلی ترجمه لری همده اصل متنی نشرلری حقیده معلومات بیریلگن. قاله بیرسه اوشبو مقدمه ده بابرنامه نینگ تۉرتته دری ترجمه لری همده بابرنینگ شعرلر دېوانی، مبین، عروض و والدیه ترجمه سی رساله لری حقیده هم قیسقه معلومات بیریلگن. «بابرنامه» نینگ اوشبو تۉلیق اۉزبیکچه متنی، تانیقلی جاپان عالمی پروفیسور ایجی مانو نینگ نسبتاً ایشانچلی تنقیدی متنی (جاپان، کیوتو، شوکادو باسمه خانهسی، 1995ییل) یوزیدن چاپگه تیارلنگن اېدی. بابرنامه نینگ اوشبو متنی 555 بیتنی قمرهب آلگن. کامران میرزانینگ حیاتی و ایجادی (اۉزبیکچه و فارسچه دېوانی نینگ تنقیدی متنی بیلن) بو کتاب ظهیرالدین محمد بابرشاه نینگ ایکینچی اۉغلی کامران میرزاگه تیگیشلی دیر. بو اثر ایکی کتابدن عبارت دیر: بیرینچی کتاب، کامران میرزانینگ حیاتی و ایجادی: بو کتاب اثرنینگ 1-228 بیتلرینی قمرهب آلگن و قوییدهگی بۉلیملردن عبارت: * کیریش 1-10 بیتلر. * بیرینچی بۉلیم، کامران میرزا حیاتی 12-89 بیتلر: - کامران میرزانینگ باله لیک و اۉسمیرلیک دوری؛ - کامران میرزانینگ سیاسی فعالیتی؛ - کامران میرزا و همایون پادشاه نینگ اۉز ارا مناسبتلری؛ - کامران میرزا حیاتی نینگ ایکینچی باسقیچی؛ - کامران میرزانینگ عاقبتی؛ - کامران میرزانینگ عایله و فرزندلری. * ایکینچی بۉلیم، کامران میرزانینگ ایجادی 90-228 بیتلر: الف) مضمون و غایه لر 91-157 بیتلر؛ ب) بدیعیلیک 158-189 بیتلر؛ ج) ژانر، وزن و قافیه 190-204 بیتلر؛ د) تأثیرلنیش یا ایزداشلیک 205-213 بیتلر؛ ه) قۉلیازمه و باسمه نسخه لر توصیفی 214-228 بیتلر. ایکینچی کتاب، کامران میرزا دېوانی نینگ تنقیدی متنی: 1- اۉزبېکچه دېوان: 230-341 بیتلر. 2- دیوان فارسی: 342-394 بیتلر. کتابشناسلیک. کۉرستگیچلر (اعلام فهرستی). بو کتاب تانیقلی شاعر و یازووچی دکتور شفیقه یارقین تمانیدن علمی متود و یۉسینده تألیف اېتیلیب، نشرگه تیارلنگن. کتاب 1388 ییلی، کابلده اعتصام باسمه خانه سیده چاپ اېتیلیب، پروفیسور غلام محمد میمنهگی شخصیتی نی اولوغلش علمی سمیناریده حرمتلی تیلداش کتاب سیورلرگه پیشکش قیلینگن اېدی. کتاب چیرایلی اۉلچم، صحافت، مقوا و کاغذ، 1000 جلدده حرمتلی سیدنورالله سادات جنابلری نینگ مادی یاردملری بیلن نشر اېتیلگن. اثرنینگ بیرینچی کتابی، مؤلف نینگ کامران میرزا حیاتی و ایجادی حقیده یرهتیلگن چوقور و ییریک تحقیقاتی دیر. بونده اۉقووچیلر، کامران میرزا حیاتی و ایجادی بیلن بیرگه بابریلر قلمروی بۉلمیش افغانستان و هندوستان یورتلری نینگ اۉنونینچی عصرگه عاید کۉپلب تاریخی واقعه لر، مدنی و ادبی آقیملر و بجریلگن ایشلر بیلن کینگ کۉلمده تانیشهدیلر. تحقیقات نینگ بو بۉلیمی اۉقووچیلر، اینیقسه عالی اۉقوو یورتلر استادلری و محصللری اوچون قیلینه جک علمی ایشلر و تحقیقاتلرنی آلغه آلیب باریشلری اوچون قیمتلی متودیک یۉلاوچی و اۉرنک وظیفه سینی اوتشی هم انیق. شونینگدېک، اثرنینگ ایکینچی کتابی کامران میرزانینگ اۉزبیکچه و فارسچه دېوانلری نینگ تنقیدی متنلرینی اۉز ایچیگه آلگن. اېسلش لازم که بوندن بورون کامران میرزانینگ اۉزبیکچه شعرلری اۉزبیکستانده (1993م) همده فارسچه شعرلری هندوستانده (1929م) باسیلیب چیققن بۉلسه هم، بیراق اولرنینگ هېچ بیری تنقیدی متن بۉلمهی، اوندن تشقری ایکله سی ایری-ایری کتاب، زمان و یورتلرده نشراېتیلگن اېدی. دکتور شفیقه یارقین هندوستان کتابخانه لریده سقلنه یاتگن اوچته قۉلیازمه، فارسچه دېوان نینگ بیرته باسمه نسخه سی همده اۉزبیکچه دېوان نینگ تاشکینت نشری، قاله بیرسه بیر قنچه تذکره، بیاض و جونگلردن هم فایده لنگن حالده کامران میرزا دېوانی نینگ نسبتاً تۉلیق تنقیدی متنینی یرهتگن. بنابرین، کامران میرزا دېوانی نینگ دکتور شفیقه یارقین نشر اېتگن کابل نشری، حاضرچه علم ساحه سیده یرهتیلگن بیرینچی و یگانه تۉلیق تنقیدی دېوان سنهلهدی. بیز اۉزبیک کلاسیک ادبیاتی گنجینه سیگه تگیشلی بو اثرنی قۉلگه کیریتیب، فایده لنیشنی برچه عزیز تیلداشلریمیزگه توصیه اېته میز. منبع: بابر ایزیدن
| 
